vetur

ég hlakka til vorsins ... eða hvað þetta nú heitir sem er ögn hlýrra en veturinn sem ríkir hér mestan part ársins.

íslenskt loft

eins og alla morgna gekk ég til vinnu minnar upp úr átta í morgun. yndisleg stund dag hvern, verð ég að segja. fáir á ferli, birtan falleg og húsin á leiðinni ekki mjög ljót og svo er loftið svo brakandi ferskt. meðan ég sit og les og laga í skrifstofunni hans hauks, sem ekki er búin opnanlegum glugga, hlakka ég bara til að fara út í hádeginu og anda aftur ... alveg einstök tilfinning.

klukkuð-klikkuð

var klukkuð af æri um helgina en frestaði þessu lengi (skýringin er í 1.)

1. ég hræðist opinbera sjálfskoðun mjög. þess vegna verður þetta bara væmið og leiðinlegt eins og annað sem frá mér kemur.
2. ég hef aldrei keypt mér sjónvarp eða útvarp en þrisvar keypt mér tölvu (þar af einu sinni nýja, þessa).
3. ég er rosalega léleg og gamaldags í snyrtifræðum: dæmi 1. einu sinni sagði fræg tískulögga og ágætur félagi minn að augabrúnirnar á mér væru ógeðslegar, en þær plokka ég uþb þrisvar á ári (að meðaltali). dæmi 2. ég byrjaði ekki að nota brjóstahaldara fyrr en 26 ára gömul (fyrir utan brjóstagjafahaldara í nokkra mánuði þremur árum áður) þegar nafna mín sagði mér að það sæist að ég væri ekki með haldara ... ég sem hélt að það væri haldarinn sem sæist þegar hann grefur sig inn í spikið á manni.
4. ég ber óendanlega virðingu fyrir sjúkrahússstarfsfólki, háu sem lágu. mæli með því við allar góðar ungar manneskjur að þær mennti sig og leggi fyrir sig starf í þessum geira. sjálf hef ég aldrei unnið við umönnun, hefði ekki þolað það andlega eða líkamlega.
5. ég er morgunmanneskja í mótun (vakna glöð og kát upp úr sjö), þótt djúpt hafi verið á henni, og mas afar djúpt lengi framan af (fram yfir tvítugt amk). símhringingar, köll og alls kyns kúnstir dugðu sko ekki og einu sinni varð ég næstum því eftir á spáni. síðustu ár hefur morgunmanneskjan verið að ryðja morgunletingjanum úr rúmi á morgnana og reka hann í rúmið á kvöldin (ég er á leiðinni í bælið núna).

þeir bloggarar sem hingað álpast inn og hafa ekki þegar verið klukkaðir mega gjarnan taka klukkið til sín. góða nótt!

á prjónonum

fletti í gær nýja rowan-blaðinu, féll fyrir truflaðri kápu, fór í storkinn í dag og keypti mér garn í ... prjónafestuprufu ... bara svona til að tékka.

fótboltastelpa

mér fannst fótboltaspjallið hans hornbys skettlett. fannst ég geta hlegið (góðlátlega) að manninum mínum (ekki með honum af því að hann var fjarverandi). ég semsé hef tekið þá stefnu í búskap mínum með fótboltaáhugamanni að hafa bara gaman af því hvað honum finnst þetta allt merkilegt í stað þess að tuða yfir því (nóg er nú tuðið samt). ég reyni samt stundum að finnast þetta líka skemmtilegt, en það er mun erfiðara; maðurinn minn er einfaldlega miklu áhugaverðara skoðunarefni á allan hátt. eftir samtalið var ég svo virkilega góð sambýliskona og fékk fótboltabókina hans hornbys vel áritaða fyrir karlinn.

endurtekur sagan sig?

einu sinni bað ég mann um að giftast mér. hann var uppáhaldskennarinn minn og ég var sjö ára. hann sagði nei.
spurning hvað rmb gerir þegar hún kynnist jónsa betur.

ein spennt!

ég er að fara á mína fyrstu kóræfingu ... eða þannig. rmb byrjar í krúttakórnum á eftir!!!!
hlökkum til, mæðgur.

karlmenn!

rithöfundur ræddi áðan um muninn á körlum og konum og því hvernig þessar skepnur nálgast hugmyndir. við hjónaleysin nálgumst hlutina mjög ólíkt. ég hef lengi talað um að við þyrftum að drífa okkur í tangó ... oft og mikið ... og minn maður ekkert verið fráhverfur hugmyndinni, enda dansmaður mikill. ég skráði okkur því um daginn og þar sem ég var ekki komin með neinn íslenskan síma sem hægt var að ná í gaf ég upp númerið hans. og auðvitað var hringt medesamme ... en þá var þessi elska náttla steinhissa ("ég bjóst við að við myndum bara ræða þetta og stefna að þessu, ekkert endilega fara" hahahaha) en gat þó valið á milli þeirra tveggja kosta á kennsludögum sem í boði. nú er hann doltið leiður, hann var nefnilega að átta sig á því að hann hefði kannski hugsanlega valið vitlausan dag ... út af einhverjum fótbolta!

skorður

allt að komast í fastar skorður. leikskóli, skóli, vinna osfrv.
sú stóra æfir sund af kappi og byrjar brátt í fermingarfræðslu og sú stutta fer í sunnudagaskólann og krúttakórinn. afskaplega kristilegt allt saman. við, hin öldnu, byrjum afturámóti á námskeiði í eldheitum tangó á morgun.

gamalt og nýtt

nýi meistarinn mættur í gömlu vinnuna sína, á leið heim í gömlu íbúðina sína. gaman gaman.