tangó

í kvöld eru tangótónleikar á nasa ... úúúúú ég hlakka til!!!

meiri skóli

síminn hringdi í morgun þegar ég var nýbúin að slökkva á vekjaraklukkunni. þetta var úr skólanum og spurt var hvort unglingurinn væri lagður af stað ... sem var ekki raunin. það var klukkutími síðan vekjaraklukkan hringdi ekki tvær mínútur.
mér leið eins og ég væri unglingurinn.

í skólanum í skólanum

litla telpan var nú frekar stór þar sem hún gekk keik og tók sér stöðu í röðinni með bekknum sínum í vesturbæjarskólanum nú áðan. og í bekknum hennar verða 19 börn. ég meðtók nú ekki öll nöfnin, en örugglega nöfn flestra stelpnanna, enda margar þeirra í leikskóla með rmb. skondið þykir mér að meðal stelpnanna eru auk ragnheiðar maríu þær hrafnhildur maría og hrafnhildur sif og hildur og mathilda ása. frekar lík nöfn. en svo eru líka thelma lind og salóme og birta björg og mist og una. veit ekki hvort það er þar með upp talið en alla vega er ljóst að hin gömlu góðu hildar/heiðar-nöfn hafa verið vinsæl árið 2001.

mjúk morgunstund

á leiðinni heim úr morgunskokkinu heyrði ég vekjaraklukkur hringja og fólk bylta sér í rúmunum. kannski hafa einhverjir vaknað við másið í mér og þungu skrefin ... hef ekki náð að losa mig við hlussusyndrómið, en það er allt í vinnslu.
eftir sturtuna kvaddi ég unglinginn og óskaði góðs gengis í eðlis- og líffræðiprófinu (sem hún gerir sér ekki alveg grein fyrir að er ein af hennar sterku námsgreinum) og drakk svo kaffið sem maðurinn minn elskulegur útbjó með ristaða soðbrauðinu sem ég smurði með smjöri og sneiddi ost ofan á (til að vinna hratt og auðveldlega upp hitaeiningarnar sem ég hafði áður hlaupið af mér). síðan knúsaði ég litlu mjúku bangsatelpuna mína sem vildi sofa áfram og hélt til vinnu í grænum sandölum (hvenær verður það söndulum?) og hvítri kápu.

pinksteren

við hæfi að hafa fyrirsögnina á erlendu máli til að minnast þess þegar heilagur andi kom yfir postulana svo að þeir töluðu tungum ... en nú mörgum árum síðar er frí af þessu tilefni á mánudegi og þess vegna er ég í vinnunni!
mér finnst þriggja daga helgarfrí æði.
ég fór með vinkonu að sjá líf annarra á föstudaginn og á veitingahús við laugaveg að spjalla og sötra vín á eftir. töluðum um glötuð tækifæri og glataðar ástir og glataða menn, en þó sýnu meir um bjarta framtíð og ný tækifæri, nýja sigra. nóg af þeim.
gaman að fylgjast með mannlífinu utan og innan dyra. á þremur stundum breyttist rólegur veitingastaður þar sem sjá mátti fólk af ýmsum stigum og á öllum aldri (þó ekki yngra en 18) í megateknópartípleis þar sem 90% gesta voru um 18 ára og hefðu því getað verið afkvæmi okkar. spes.
meðal þess sem gladdi augað utan dyra þetta fallega vorkvöld í reykjavík var kona á rauðri kápu og rauðum spænskum skóm, sem ég gæti trúað að væru merktir ras. með henni í för var líffræðingur.
þau sáu mig ekki.

1. júní

ég hlakka til að þurfa ekki að koma við í þvottahúsinu þegar ég kem heim af ölstofunni. kannski fjölgar ferðum mínum þangað ... úr tveimur á ári.

í upphafi skyldi endinn ekki skoða

það er ekki alltaf áfangastaðurinn sem skiptir máli heldur leiðin þangað,
ekki markmiðið sem maður setur sér heldur hvernig því er náð,
ekki niðurstaðan sem maður fær heldur hvernig hún var fengin ...

ég vil ekki skoða endinn í bókinni sem ég er að lesa fyrr en ég er komin þangað og kannski finnst mér bara ekkert mikið til um hann. líklega verð ég líka búin að gleyma honum á næsta ári. en ég verð ekki búin að gleyma að mér þótti bókin góð og hún hafði áhrif á mig og skilur eitthvað eftir.

áfram með lagalesturinn

heja norge!

farin til danmerkur
gloria in excelsis deo

allt að gerast

pabbi minn elskulegur verður sjötugur á föstudaginn en af því að við tvær syngjandi systurnar erum á leið til danmerkur í fyrramálið að syngja h-mollinn sundur og saman verður honum haldin veisla í dag!!!

oosterpark

við fótskör jóns sigurðssonar situr missaklaus pöpullinn og sleikir sólina
inni búum við okkur undir innrás nýliðanna

5 km

utandyrahlaup með maraþonstelpunni í dag.

aldurinn

ég var að fá nýtt gyllt og fallegt kreditkort.
þegar það rennur út verð ég orðin fertug.

hjólað í vinnuna og flogið aftur heim

það eru nokkur ný eða nýleg hjól frammi í anddyri. og búið að senda harmonikkutónana sem hljómuðu fyrir utan ríkið úr landi.

vort vor!

gekk í vinnuna á morgun. 551 m. þar með er ég orðin þátttakandi í landsverkefninu "hjólað í vinnuna". en ég geng alltaf í vinnuna, sama hvernig viðrar. á leiðinni í vinnuna kem ég oft við í leikskólanum og skil barnið eftir þar. þarf ekki einu sinni að leggja lykkju á leið mína til þess.
fékk mynd og miða í leikskólanum. á myndinni eru börnin á deildinni hennar rmb. svo sæt! sum þeirra "útskrifast" í vor, þá m hún! miðinn tengdist einmitt því: næsta mánudag á barnið mitt að mæta í leikskólann með hollt nesti í tösku sem hún fer með í heimsókn í skólann. þar fá þessi litlu kríli að prófa að sitja heila kennslustund með kennara og borða nestið sitt.
ljúfsárt fyrir mömmuna.
nú skríður sólin fram ... vorið er komið ...